Новите кинески царини за американските земјоделски производи би можеле да ги преобликуваат глобалните трговски текови, што ќе го натера најголемиот увозник на земјоделски производи во светот да набавува повеќе месо, млечни производи и житарки од земјите во Јужна Америка, Европа и Пацификот.
Испораките во Кина од клучните извозници, како Бразил, кој води во извозот на соја, Австралија, најголемиот извозник на пченица и Европа, главниот снабдувач на свинско месо, би можеле да се зголемат бидејќи трговската војна меѓу двете најголеми светски економии се вжештува, велат индустриските експерти и аналитичари.
Кина, пренесува Ројтерс, брзо возврати на новите американски царини во вторникот, најавувајќи зголемување на увозните давачки за 10 и 15 отсто на американските земјоделски производи во вредност од 21 милијарда долари.
Земјата е најголемиот пазар за американскиот извоз на земјоделски производи, купувајќи производи во вредност од 29,25 милијарди долари минатата година, така што секое поместување на трговските текови може да создаде можности за конкурентните извозници.
Ова ќе го продолжи трендот на намалување на зависноста на Кина од американското земјоделство, што започна за време на трговската војна во првиот мандат на претседателот Доналд Трамп.
Испораките на месо од Европа и Јужна Америка во Кина се очекува да се зголемат како резултат на тоа, велат аналитичарите.
Иако Кина започна антидампинг истраги за увоз на свинско месо и млечни производи од Европската унија минатата година, продажбата не беше засегната.
Во вторникот, Трамп, исто така, воведе царини за стоки од Канада и Мексико, што може да и наштети на американската земјоделска индустрија, чиј извоз е вреден 191 милијарда долари.