Германскиот воен концерн Рајнметал, кој се очекува да биде еден од главните корисници на значително повисоките европски трошоци за одбрана, во средата соопшти дека очекува силен раст на продажбата во 2025 година и дека работи на ажурирање на своите прогнози во светло на неодамнешните геополитички настани.
Рајнметал, најголемата германска воена компанија – најпозната по производство на оклопни возила и артилериски гранати – очекува продажбата да скокне за 25-30 проценти во 2025 година, во услови на војна во Украина и поделба на САД со Европа.
Во исто време, тие предвидуваат и подобрување на деловните резултати и оперативните маржи, на околу 15,5 отсто, во споредба со 15,2 отсто во 2024 година. Сепак, тие забележаа во извештајот дека проекциите не го земаат предвид „подобрениот пазарен потенцијал што се очекува да се појави на пазарите кои се особено релевантни“, и дека тие ќе ги приспособат предвидувањата бидејќи потребите на нивните клиенти стануваат поконкретни.
Rheinmetall стана ѕвезда на европските берзи во последните неколку недели, како дел од поширокиот тренд на инвестиции во европските воени компании. Од почетокот на годината вредноста на акциите на Рајнметал се удвои – само во последниот месец е зголемена за повеќе од 70 отсто, а во средата, по објавувањето на деловните резултати, акциите поскапеа за 7 отсто во дневното тргување.
Инвеститорите, исто така, очекуваат компанијата, петта по големина во европскиот одбранбен сектор, да има корист од најавите на лидерите на Европската унија дека планираат големо зголемување на воените трошоци во следните неколку години, како и од најавата на новата германска коалициска влада која најави неколку стотици милијарди инвестиции во воена опрема и инфраструктура.
„Во Европа започна ера на повторно вооружување, која ќе бара многу од сите нас. „Сепак, гледаме и можност за раст во следните неколку години, какви што досега не сме имале“, се вели во изјавата на извршниот директор Армин Папергер.