Цената на барелот на лондонскиот пазар минатата недела порасна за 0,3 отсто, на 70,58 долари, додека на американскиот пазар цената на барелот порасна за 0,2 отсто, на 67,18 долари.
По три недели пад, цените на нафтата останаа практично непроменети минатата недела, бидејќи трговците стравуваат дека тарифната војна, која американскиот претседател Доналд Трамп ја води на повеќе фронтови, може да ја ослаби побарувачката.
На почетокот на минатата недела стапија на сила царините од 25 отсто за увоз на челик и алуминиум во САД, а Канада и Европската комисија најавија контрамерки.
Меѓу другото, ЕК најави царини од 50 отсто за увоз на американско виски. Како одговор, Трамп се закани со царини од 200 отсто за увоз на европски вина и алкохолни пијалоци.
Канада, пак, се закани дека ќе воведе дополнителни давачки за цената на електричната енергија што ја извезува во северниот дел на САД, а Трамп се закани дека ќе ги зголеми тарифите за увозот од Канада од 25 на 50 отсто. И пред тоа Вашингтон воведе царини за увоз од Кина, а Кина возврати со истата мерка.
Трговците стравуваат дека тарифната војна ќе доведе до зголемена инфлација и негативно ќе влијае на меѓународната трговија и економскиот раст, а со тоа и на побарувачката на енергија.
Учесниците на пазарот, исто така, внимателно ги следеа вестите за напорите за започнување преговори за ставање крај на руско-украинската војна. Украинските претставници го прифатија предлогот на САД за 30-дневен прекин на огнот и чекаат јасен одговор од Москва.
Рускиот претседател Владимир Путин во четвртокот изјави дека Москва се согласува со американските предлози, нагласувајќи, сепак, дека прекинот на огнот треба да биде увертира за траен мир и да вклучи обиди за решавање на причините за конфликтот. Аналитичарите од одговорите на Москва заклучија дека војната нема да заврши наскоро.