Миграцијата од Западен Балкан во Германија се покажа како успешна приказна, но владејачката коалиција ЦДУ/ЦСУ и СПД планира да го намали бројот на пристигнувања од шест земји во регионот.
Наспроти ова, Институтот за германска економија (IW) повикува на олеснување на миграцијата од земјите на поранешна Југославија и Албанија, истакнувајќи ги економските придобивки за Германија, пишува RedaktionsNetzwerk Deutschland (RND), пренесува N1.
Пред десет години, приливот на баратели на азил од Србија, Албанија, Црна Гора, Северна Македонија и Босна и Херцеговина предизвика реакции во јавноста. Повеќето од овие луѓе не добија заштита, а нивното доаѓање во Германија беше мотивирано од релативно високи социјални придонеси. Како одговор, тогашната германска влада ги заостри регулативите за азил и го воведе „правилото на Западен Балкан“, со што го олеснува ангажирањето работници од регионот.
Сепак, годишната квота за мигранти за работна сила беше ограничена на 50.000 лица. Новата германска влада сега планира да ја преполови таа бројка на 25.000 годишно, пишува RND.
Експертот за миграција во IW, Видо Геис-Тоне, смета дека намалувањето на квотата би било погрешно. Според неговите податоци, бројот на вработени од земјите од Западен Балкан, кои не припаѓаат на ЕУ, се зголемил во периодот од 2019 до 2024 година за 165.000, достигнувајќи 521.000 работници. Тој посочува дека многу мигранти работат како квалификувани професионалци – во летото 2024 година, околу 300.000 од нив имале работа за која е потребна стручна обука или диплома, што е за 100.000 повеќе од пет години порано.
Позитивен биланс за државата
Дополнително, податоците на IW покажуваат дека бројот на луѓе на социјална помош кои можеле да работат се намалил за 3.000 помеѓу 2019 и 2023 година, достигнувајќи 88.000. Геис Тоне заклучува дека мигрантите од Западен Балкан како целина повеќе придонесуваат преку даноци и придонеси отколку што добиваат државни бенефиции, и затоа нема причина да се ограничи миграцијата.
Експертите предупредуваат и на демографски промени кои водат до зголемен недостиг на работна сила. IW е посветена на дополнително олеснување на вработувањето на работници од Западен Балкан, вклучително и забрзување и поедноставување на визните процедури.
Геис Тоне, исто така, ја нагласува важноста од посилна интеграција на Западен Балкан на европскиот пазар, вклучувајќи ја и слободата на движење на работниците. Тој предупредува дека слабата интеграција може да доведе до разочарување на населението во Југоисточна Европа, што би го искористиле другите сили како Русија.