Швајцарската фармацевтска компанија Новартис најави дека во следните пет години ќе инвестира 23 милијарди долари во производство и истражување и развој на лекови во САД.
Novartis има намера да прошири три објекти и да изгради уште шест, а планот вклучува и нов биомедицински истражувачки и иновативен центар во Калифорнија, кој треба да започне со работа во 2028 или 2029 година, се вели во соопштението објавено во четвртокот на веб-страницата на американската подружница.
Планот е да се произведуваат клучни лекови целосно во САД, со отворање на речиси илјада нови работни места, се додава.
Нема коментар за американските тарифи
Компанијата во соопштението не ги спомна новите американски тарифи, а одлука за толку голема инвестиција обично не се носи неколку недели.
Фармацевтската компанија не одговори на прашањето дали најавената инвестиција е поврзана со новата американска трговска политика, забележува германската новинска агенција dpa.
Проширување на капацитетите за американскиот и светскиот пазар
Швајцарската компанија веќе произведува иновативни и софистицирани лекови во САД, како генска и клеточна терапија, како за американскиот така и за светскиот пазар, се вели во соопштението за медиумите, а сега ќе го зголеми капацитетот за производство на основни лекови и ќе донесе производство засновано на иновативни технологии на американско тло.
„Инвестицијата ќе ни овозможи да внесеме целосен синџир на снабдување и клучни технолошки платформи и значително да ја подобриме веќе „силната“ перспектива за раст“, рече извршниот директор на Novartis, Вас Нарасимхан.
Американскиот пазар е приоритет за Новартис, потенцираа оттаму, истакнувајќи дека со најавените 23 милијарди, вкупниот износ на инвестиции во следните пет години ќе се зголеми на 50 милијарди долари.
Лековите се ослободени од новите американски царини, но американскиот претседател јасно стави до знаење дека е подготвен да ги користи за да ги поттикне производителите да градат погони во САД, потсетува ДПА.