Претседателката на Европската комисија (ЕК), Урсула фон дер Лајен, вчера изјави дека сè повеќе земји во светот сакаат да склучат трговски договори со ЕУ, наведувајќи дека тоа е „позитивен несакан ефект“ откако американскиот претседател Доналд Трамп ги зголеми тарифите за стоките увезени во САД.
Фон дер Лајен изјави за германскиот весник Цајт дека „Европа е целосно будна“ за можностите за „нов светски поредок“.
– Во моментов водам голем број разговори со шефови на држави и влади ширум светот кои сакаат да работат заедно со нас на новиот поредок – изјави Фон дер Лејен.
Таа посочи дека не се работи само за економски врски, туку и за воспоставување заеднички правила и предвидливост.
„Сега мораме да го искористиме овој моментум за да отвориме нови пазари за нашите компании и да воспоставиме што е можно поблиски односи со многу земји кои имаат исти интереси како нас“, рече Фон дер Лејен.
Откако беа воведени новите американски царини на 2 април, бран на несигурност ја зафати трансатлантската трговија, при што ЕУ бара нови начини за продлабочување на врските со другите големи економии, како што е кинеската, објави Политико.