Администрацијата на претседателот Доналд Трамп ќе го намали влијанието на царините за автомобили со ублажување на царините за увезените делови што се користат во автомобилите произведени во САД и задржување на царините за странските автомобили, соопштија официјални лица.
„Претседателот Трамп гради партнерства и со домашните автомобилски компании и со нашите вредни американски работници“, изјави министерот за трговија Хауард Лутник.
„Тој договор е голема победа за трговската политика на претседателот бидејќи ги наградува компаниите што произведуваат во САД, а во исто време им дава простор на производителите кои ветија дека ќе инвестираат во Америка и ќе го прошират производството.“
Автомобилските компании претходно во понеделник објавија дека очекуваат Трамп да им помогне пред неговото патување во Мичиген, каде што работат три големи производители и повеќе од илјада подизведувачи.
Нивните здруженија минатата недела го повикаа да не воведува царини од 25 проценти на увезените автоделови, бидејќи тоа би можело да ја намали продажбата и да ги зголеми цените. Трамп претходно изјави дека ќе ги воведе овие царини до 3 мај.
Писмото, испратено од групи што ги претставуваат „Џенерал моторс“, „Тојота мотор“, „Фолксваген“, „Хјундаи“ и други, беше испратено до Лутник и секретарот за финансии Скот Бесент.
„Повеќето добавувачи немаат доволно капитал за справување со царинските прекини. Многумина веќе се во проблеми и се соочуваат со прекини во производството“, се вели во писмото, додавајќи дека „неуспехот на еден од нив би можел да ја запре целата производствена линија за автомобили“.