Минатиот месец во Германија, посетите на бензинска пумпа станаа поевтини, но викенд-шопингот во супермаркет стана поскап. Генерално, инфлацијата забави втор месец по ред во април, објави Дестатис.
Падот на цената на енергијата ја намали годишната стапка на инфлација на 2,1 процент, што е најниска од октомври. Во претходните два месеци, инфлацијата изнесуваше 2,2 проценти, пренесува ДПА.
Малопродажните цени се зголемија за 0,4 проценти од март.
Економистите очекуваат инфлацијата да се движи помеѓу два и 2,5 проценти во наредните месеци, и покрај потиснувачкото влијание на трендот на намалување на цените на горивата и зајакнувањето на еврото.
„Цените постојано растат во услужниот сектор, без оглед на економската криза и слабоста на пазарот на трудот“, изјави економистот на Дојче банк, Себастијан Бекер.
Авионските билети се зголемија за 19,1 процент, а рестораните за 4,9 проценти, што е значително повеќе отколку во другите земји од еврозоната. Економистите го припишуваат ова на силниот раст на платите.
Цените на храната повторно се зголемија над просекот, за 2,8 проценти во споредба со април минатата година. Особено изразен беше скокот на цената на сезонското овошје и зеленчук за 5,6 проценти.
Од друга страна, цената на нафтата и сите нејзини деривати се намали во просек за 8,3 проценти. Цените на енергијата генерално паднаа за 5,4 проценти.