Амбасадорите на земјите-членки на Европската Унија во среда постигнаа договор за 17-тиот пакет санкции против Русија, кој треба да го потврдат министрите за надворешни работи следната недела. Новиот пакет санкции вклучува речиси 200 нови танкери од таканаречената флота во сенка што Русија ги користи за да ги заобиколи санкциите.
Станува збор за стари, неосигурени бродови кои користат разни трикови за да го сокријат потеклото на нафтата што ја транспортираат, вклучително и испраќање фалсификувани податоци и исклучување на транспондерите. Се сомнева дека бродовите се користат и за саботажи на подморничката инфраструктура.
Досега, на санкционираната листа има 153 вакви бродови, на кои им е забрането да се закотвуваат во европските пристаништа. Сега тој број се зголемува на околу 350 бродови. 30 компании се додадени на списокот на оние кои се вклучени во заобиколувањето на санкциите, особено кога станува збор за производи со двојна намена. Тие компании ќе се соочат со нови трговски ограничувања.
Додадени се уште 75 поединци и компании поврзани со воено-индустрискиот комплекс. Според Хина, извозот на хемикалии од ЕУ што можат да се користат за производство на ракети е исто така забранет. Освен овој 17-ти пакет, ЕУ се заканува со нови масовни санкции доколку Русија не се согласи на безусловно примирје во Украина.
Претседателката на Европската комисија, Урсула фон дер Лајен, го поздрави договорот за 17-тиот пакет санкции против Русија.
Во своето соопштение на Платформа X, фон дер Лајен истакна дека новиот пакет санкции вклучува дополнителни ограничувања за пристап до технологии што се користат на бојното поле, како и вклучување на дополнителни 189 бродови од таканаречената „флота во сенка“ на листата, чија цел е рускиот извоз на енергија, особено нафтата.
„Оваа војна мора да заврши. Ќе продолжиме да вршиме силен притисок врз Кремљ“, рече фон дер Лајен.
Владимир Путин претходно во вторникот коментираше за можното воведување нови санкции.
„Се чинеше дека тоа (воведување санкции) нема да се направи затоа што ќе им наштети (на нив) (на Европа). Но, тие го направија тоа – идиоти. Простете ми“, рече Путин, гестикулирајќи иронично. Тој додаде дека водечките светски економии влегуваат во рецесија само за да ѝ наштетат на Русија.