Поради царинската политика на претседателот на Соединетите Американски Држави, Доналд Трамп, автомобилските гиганти ширум светот сè повеќе размислуваат за зголемување на локалното производство во САД.
Германската компанија Mercedes-Benz Group AG потврди дека ќе го премести производството на својот најпродаван SUV модел GLC од Германија во САД, објави Bloomberg.
Компанијата на почетокот на месецот објави дека ќе го премести производството на „возила од клучниот сегмент“ преку Атлантикот, но досега не беше познато за кој модел станува збор.
Мерцедес не сакаше директно да потврди дека оваа одлука е резултат на политиката на американскиот претседател, кој дополнително ги зголеми царинските давачки за увоз на автомобили во САД – од сегашните 2,5% на дури 25%.
„Ако погледнете што сакаме да постигнеме со продажбата на овој модел, има смисла да го произведуваме во Америка“, изјави шефот на Мерцедес за Северна Америка, Џејсон Хоф, на брифинг за медиумите во понеделник.
Моментално, GLC произведен во Германија е најпопуларниот модел на Мерцедес увезен во САД, со почетна цена од 49.250 долари (44.193 евра). Само минатата година, Мерцедес продаде повеќе од 64.000 единици од овој хибриден модел во Америка – што е повеќе од 50% повеќе од претходната година, објави Investor me.
Производството ќе се одвива во фабриката на Мерцедес во Таскалуса, Алабама, а почетокот на склопувањето на моделот GLC во САД е планиран за 2027 година.
Други големи автомобилски компании најавија слични потези, во обид да ги намалат трошоците што им ги наметнува американската царинска политика, преку локализација на производството – во согласност со желбите на американскиот претседател.
Засега не е објавено колку нови работни места би можел да создаде Мерцедес со овој потег, ниту пак колкав е дополнителниот износ на планираните инвестиции.
Белата куќа брзо ја поздрави оваа одлука и ја искористи можноста да посочи и други примери – БМВ размислува за проширување на капацитетот на фабриката во Јужна Каролина, Стелантис ќе го рестартира фабриката во Илиноис, Хонда планира да го префрли производството на моделот Цивик од Јапонија во САД, додека Хјундаи планира инвестиција вредна 20 милијарди долари.