Европската унија работи на нов, 18-ти пакет санкции за зголемување на притисокот врз рускиот претседател Владимир Путин поради војната во Украина, изјави во петок претседателката на Европската комисија, Урсула фон дер Лајен, на состанокот на државните лидери од цела Европа во Тирана.
Сепак, Европската Унија веќе усвои 17 пакети санкции – најновиот оваа недела – а дипломатите велат дека станува сè потешко да се добие потребната едногласност од сите 27 земји-членки за нови мерки против Москва.
„Тој не сака мир, па затоа мора да го зголемиме притисокот и затоа работиме на нов пакет санкции“, рече фон дер Лајен, зборувајќи за Путин и војната во Украина на почетокот од самитот на Европската политичка заедница (ЕПЗ) во Албанија. „Овој нов пакет ќе вклучува, на пример, санкции за гасоводите Северен тек 1 и Северен тек 2. Исто така, ќе вклучува санкции за уште повеќе бродови од руската „флота во сенка“, намалување на ограничената цена на руската нафта, како и нови санкции за рускиот финансиски сектор.“
„Северен тек 1“ и „Северен тек 2“ се клучни гасоводи изградени од рускиот државен гигант „Газпром“ за извоз на гас од Русија во Германија. И двата се состојат од две цевки и се протегаат по дното на Балтичкото Море. Сообраќајот на Северниот тек 1 беше прекинат по руската инвазија на Украина, додека Северниот тек 2 беше завршен пред војната и никогаш не беше ставен во употреба. И двата беа тешко оштетени во подводни експлозии во 2022 година.
Сепак, дипломатите велат дека успехот на „огромните“ нови санкции со кои европските лидери се заканија во последниве денови би барал поддршка од САД. Во меѓувреме, руските и украинските преговарачи се состанаа во петокот во Истанбул на првите директни мировни преговори по повеќе од три години, под притисок од американскиот претседател Доналд Трамп, кој исто така сака да се стави крај на најсмртоносниот конфликт во Европа по Втората светска војна.