Турскиот претседател Реџеп Таип Ердоган изјави дека во Црното Море се откриени нови резерви на природен гас од 75 милијарди кубни метри.
Ердоган рече дека со оваа количина природен гас, Турција ќе може да ги задоволи потребите на населението за околу 3,5 години, објави агенцијата Анадолија.
„Откривме нови резерви на природен гас од 75 милијарди кубни метри на полето. Со оваа количина ќе можеме да ги задоволиме потребите на населението за само околу 3,5 години“, рече Ердоган за време на говорот на отворањето на Истанбулската болница за обука и истражување за физикална терапија и рехабилитација.
Тој истакна дека „работата на бунарот Ѓоктепе-3“ во Црното Море, која ја започна на 27 март турскиот брод за дупчење „Абдулхамид Хан“, беше завршена вчера.
Ердоган ја нагласи посветеноста на Анкара на енергетската независност.
„Ќе продолжиме по нашиот пат без запирање, без одмор и без да обрнуваме внимание на критиките или пречките сè додека не ја постигнеме нашата цел, а тоа е целосно енергетски независна Турција“, рече Ердоган.
