Volkswagen од 2026 ја укинува ID ознаката за електричните возила и воведува нови, традиционални имиња за своите ЕВ модели.
Volkswagen планира да ја напушти ID ознаката за својата гама на електрични возила. Од 2026 година, компанијата ќе започне со постепено заменување на ID имињата со традиционални, препознатливи имиња од своето портфолио, како дел од поширока стратегија за поедноставување на понудата и приближување до потрошувачите.
ID ера што завршува
ID под-брендот на Volkswagen беше лансиран во 2017 година со концептот на ID.3, а сериската верзија се појави во 2019 година. Следеа модели како ID.4, ID.5, ID.6 (ексклузивно за Кина), ID.7 и ID. Buzz, а се најавуваа и ID.1 и ID.2 до 2027 година. Сепак, плановите се менуваат.
Во интервју за Auto und Wirtschaft, Мартин Сандер, член на Управниот одбор на VW за продажба и маркетинг, откри:„Автомобилите повторно ќе добијат вистински имиња. ID.2all и ID. Every1 нема да ги задржат овие имиња во сериска верзија.“
Според наводите, ID.2 би можел да го добие името Polo, во чест на 50-годишнината од моделот, а ID.1 можеби ќе биде инспириран од имиња како Lupo, Fox или Up!, или ќе носи сосема ново име.
Рестартирање со нов дизајн и познати имиња
Како дел од оваа транзиција, ID моделите ќе добијат освежен дизајн од 2026 година, што е идеален момент за промена на имињата. Покрај тоа, Volkswagen работи на електричен Golf, електричен T-Roc, како и потенцијално електрични верзии на Passat и Tiguan.
Предизвикот ќе биде да се направи јасна разлика меѓу електричните и конвенционалните верзии, бидејќи моделите со мотори на внатрешно согорување ќе останат во производство уште неколку години.
Амбициозни планови за продажба на ЕВ модели
Сандер изјави дека побарувачката за електрични возила расте, особено за ID.3 и ID.7, кој веќе продава повеќе од Passat во Европа. Голем интерес има и за ID. Buzz, особено во САД.
Компанијата постави агресивни цели за продажба со најавата на ID.2all, кој ќе чини околу €25.000, и ID. Every1, кој ќе стартува со цена од €20.000. Овие цени ќе бидат возможни благодарение на падот на цените на батериите, нови методи на производство и строги мерки за намалување на трошоци.
„Мораме да ја преиспитаме секоја компонента. Не се потпираме на надеж, туку на реални бројки и стратегии“, изјави Сандер.
Преземено од Автоплус.мк