Благодарение на растот на државната потрошувачка и извозот и увозот, хрватската економија забележа раст во првиот квартал од оваа година од 2,9 проценти на годишна основа, што е побавно отколку во претходниот квартал, но сепак побрзо од просекот на Европската унија.
Државниот завод за статистика (ДЗС) на Хрватска ја објави првата проценка во среда, според која бруто домашниот производ (БДП) во првиот квартал од 2025 година се зголемил за 2,9 проценти во реални услови во споредба со истиот период минатата година.
Хрватската економија расте 17-ти квартал по ред, но побавно отколку во претходниот квартал, кога растот изнесуваше 3,9 проценти.
Според сезонски прилагодените податоци од ДЗС, економијата пораснала за 3,1 процент на годишна основа во првите три месеци од оваа година, а за 0,3 проценти на квартална основа, пренесува Хина.
Евростат неодамна објави дека во првиот квартал од оваа година, според сезонски прилагодените податоци, економијата на ЕУ пораснала за 0,3 проценти во споредба со претходниот квартал, додека на годишна основа пораснала за 1,4 проценти. Во тој квартал, економијата во Еврозоната пораснала за 0,3 проценти на квартална основа, а за 1,2 проценти на годишна основа.