Банките во Еврозоната мора да обрнат внимание на растот на лошите кредити, особено при кредитирање на помали компании, потрошувачи и секторот за комерцијални недвижности на помалку атрактивни локации, изјави Шерон Донери, членка на надзорниот одбор на Европската централна банка (EЦБ).
Од пандемијата, ЕЦБ периодично предупредуваше за ризикот од нефункционални кредити, но досега тоа не се материјализираше освен мало зголемување во текот на 2024 година.
И покрај поволниот развој на ситуацијата во последните неколку години, Донери наведе неколку ранливи области на кои треба да се обрне внимание, особено во светлината на геополитичките и трговските тензии.
„Сегашната геополитичка средина додава нов слој на неизвесност и е извор на ризици од опаѓање. Зголемените тензии во глобалната трговија и нарушувањата во синџирот на снабдување, исто така, претставуваат ризици за банките со значителна изложеност на извозно ориентирани сектори“, рече Донери на финансиска конференција во Милано.
Според неа, перспективите се особено предизвикувачки кога станува збор за кредити за комерцијални недвижности кои не се во области со голема побарувачка.
Таа изјави дека во последниот квартал од минатата година е забележано мало зголемување на доцнењето во отплатата на потрошувачките кредити и рече дека банките мора да се подготват за евентуално понатамошно влошување во случај на полоши економски околности.
Таа, исто така, истакна дека претпазливоста е клучна при кредитирање на мали и средни претпријатија бидејќи тие ќе го сносат товарот на влошувањето на економијата.
Фото Pixabay
