Европа мора да го зголеми економскиот раст за да се справи со глобалните предизвици или ризикува да го изгуби својот начин на живот, изјави Кристалина Георгиева, директорка на Меѓународниот монетарен фонд (ММФ).
„Не сакам Европа да стане Соединети Американски Држави, но сакам нејзината продуктивност и функционалност да растат“, изјави таа за „Еуроњуз“.
„Во Европа, уживаме да бидеме „суперсила на животниот стил“. Ако не станеме попродуктивни, би можеле да ја изгубиме таа предност“, додаде таа.
Клучната порака на ММФ е дека Европа мора да го забрза напредокот во рамките на единствениот пазар што овозможува слободно движење на стоки, услуги, капитал и луѓе меѓу земјите-членки.
„Во Европа нема царински давачки, но тоа не значи дека нема пречки – регулаторни и други“, рече Георгиева.
ММФ проценува дека регулаторните и другите бариери на единствениот пазар дејствуваат како да има царина од 44% за стоки и дури 110% за услуги.
Споредба со САД
Георгиева истакна дека во САД 70% од произведените стоки се пласираат на пазарот во други федерални држави, додека во Европа 70% од производството се троши во земјата каде што е произведено, а само 30% се извезува. Ова, вели го ограничува растот, бидејќи пазарите остануваат помали и помалку конкурентни.
„Доколку Европа го комплетира единствениот пазар, во рок од 10 години БДП би се зголемил за 3%“, истакна Георгиева.
За да се постигне напредок, ММФ препорачува намалување на регулаторната фрагментација, поддршка на мобилноста на работната сила, олеснување на прекуграничните банкарски спојувања, интегрирање на енергетскиот пазар и унапредување на развојот на Унијата на капитални пазари (УКП).
Целта на УКП е да се овозможи слободен проток на инвестиции и заштеди меѓу членовите, да се олесни пристапот до финансирање и да се стимулира растот и вработувањето. ММФ, исто така, препорачува ЕУ да ја зголеми запознаеноста на институционалните инвеститори со ризичниот капитал и да ги отстрани пречките за инвестиции во оваа класа на средства.
Макроекономски перспективи
ММФ предвидува умерен раст на еврозоната од 0,8% во 2025 година, кој би можел да се зголеми на 1,2% во 2026 година.
Сепак, трговските и геополитичките тензии ќе продолжат да влијаат врз расположението на инвеститорите, трошењето и инвестициите.
Во врска со каматните стапки, ММФ верува дека „монетарната политика блиску до неутрална позиција е оправдана“, бидејќи инфлацијата се приближува кон целта на Европската централна банка од 2%.
Кога станува збор за фискална одржливост, ММФ сугерира дека земјите со силни јавни финансии треба да ги поддржат оние со помал фискален простор.
„Клучно е внимателното спроведување на фискалните правила на ЕУ, така што земјите со ниски фискални ризици и амбицијата за зголемување на трошењето со цел раст и отпорност не бидат спречени од самите правила“, се вели во соопштението на ММФ.
Фото: Pixabay