Американскиот милијардер Илон Маск повторно го критикуваше предлогот за буџет на американскиот претседател Доналд Трамп, нарекувајќи го „апсолутно луд“ и предупредувајќи дека ќе ја фрли Америка во должничко ропство и ќе уништи милиони работни места.
Технолошкиот могул Илон Маск вчера објави низа пораки на социјалните мрежи, во кои го критикуваше законот за даноци и трошоци на американскиот претседател Доналд Трамп и им се закани на политичарите кои гласаат за него со предизвик на примарни избори финансиран од најимотниот човек во светот.
„Секој член на Конгресот кој водеше кампања за намалување на владините трошоци, а потоа веднаш гласаше за најголемото зголемување на долгот во историјата, треба да ја спушти главата од срам!“, напиша Маск на својата платформа на социјалните мрежи „X“. „И ќе ги изгубат своите прелиминарни избори следната година ако тоа е последното нешто што ќе го направам на оваа Земја“.
Во друга објава, Маск ја нападна она што го нарече „демократско-републиканска унипартија“, велејќи дека ако „овој луд закон за трошоци помине, Американската партија ќе биде формирана следниот ден“.
„Време е за нова политичка партија која навистина се грижи за луѓето“, напиша тој во уште еден пост, нарекувајќи ги Соединетите Држави „земја со една партија – ПАРТИЈАТА НА СВИЊИТЕ!!“ Кавгата помеѓу Маск и Трамп, која прерасна во отворена вербална војна, беше предизвикана од законот за даноци и трошоци.
The latest Senate draft bill will destroy millions of jobs in America and cause immense strategic harm to our country!
Utterly insane and destructive. It gives handouts to industries of the past while severely damaging industries of the future. https://t.co/TZ9w1g7zHF
— Elon Musk (@elonmusk) June 28, 2025
Американскиот претседател има за цел да го искористи законодавството за да ги реализира клучните предизборни ветувања, додека Маск повикува на значително подлабоки кратења на трошоците. Законот моментално е предмет на расправа во Сенатот. Доколку биде усвоен таму, сепак треба да добие зелено светло од Претставничкиот дом.
Трамп со недели се залага за донесување на законот, вршејќи притисок врз критичарите во Републиканската партија. Фискално конзервативните дисиденти, како Маск, неодамна го критикуваа законот дека не оди доволно далеку во намалувањето на државните трошоци и за зголемување на горната граница на долгот.
Независната Канцеларија за буџет на Конгресот предвиде дека предлогот на Сенатот ќе додаде 3,3 трилиони долари на буџетскиот дефицит во текот на следните 10 години.