Турските власти повторно ја зголемија таксата за премин на бродови низ Босфор и Дарданелите за 15 проценти. Во образложението на одлуката, руските медиуми објавија дека станува збор за погуст сообраќај и зголемено оптоварување на инфраструктурата.
Министерот за транспорт и инфраструктура, Абдулкадир Уралоглу, повтори дека таксите што се собираат од бродовите што минуваат низ Босфор и Дарданелите, според Конвенцијата од Монтре, се пресметуваат врз основа на нето тонажата на бродовите.
Од 1 јули 2025 година, тие ќе бидат зголемени за 15 проценти во споредба со минатата година. Ќе изнесува 5,83 долари по тон, рече Уралоглу, според извештајот на руската новинска агенција ТАСС.
Транзитната такса со тоа е зголемена по четврти пат од 2022 година, а цената на транзитот во тој период се зголемила повеќе од седумкратно. До 2022 година, таа изнесувала 80 центи по тон за цели 38 години.
Минатата година, повеќе од 51.000 бродови поминале низ Босфорот и Дарданелите, со вкупно платени такси од 277 милиони долари, според ТАСС.
Во 2023 година, според изјавата на министерот Уралоглу во јули, 83 илјади бродови поминале низ теснецот, објави „Туркије Тудеј“.
Турските власти велат дека ја зголемуваат таксата поради зголемениот поморски сообраќај, што носи ризици и оптоварува инфраструктурата и крајбрежните услуги. Парите ќе бидат претежно искористени за финансирање на крајбрежната стража, спасувачите, медицинскиот персонал и другите служби за итни случаи, додадоа тие.