Европскиот парламент усвои законски измени што носат поголема флексибилност кога станува збор за полнење на резервоарите за гас пред зимската грејна сезона, што треба значително да ја намали нестабилноста на цените на гасот во летниот период.
Имено, бидејќи досега постоеја фиксни датуми до кои резервоарите за гас во Европската Унија (ЕУ) требаше да достигнат одредено ниво на полнење, ова значително влијаеше на побарувачката и цената, а потоа ги поттикна шпекулациите со цените на пазарот на гас.
Новите правила според постојниот европски модел за складирање гас, кој важи до крајот на 2027 година, повеќе не бараат складирањето на гас да биде 90 проценти полно на 1 ноември.
Наместо тоа, на земјите-членки им е дозволено да го достигнат тоа ниво во кое било време помеѓу 1 октомври и 1 декември. Покрај тоа, откако ќе се достигне тоа ниво, земјата-членка нема да биде обврзана да одржува 90 проценти зафатеност до 1 декември.
Земјите-членки, исто така, имаат можност да отстапат до 10 проценти од стандардното ниво во случај на особено тешки пазарни околности, како што се шпекулативни цени што го спречуваат полнењето на складирањето со исплатливост. Европската комисија може, во случај на потрајни тешки пазарни активности, да го зголеми тој процент на 15 проценти за една гасна сезона.
Операторите за складирање на гас во земјите-членки се обврзани да достават информации за тоа колку складиран гас потекнува од Русија во согласност со планот за постепено откажување од увоз на тој извор на енергија од Русија. На овој начин, се поедноставува надзорот врз количините на руски гас на територијата на ЕУ.
Да ве потсетиме дека ЕУ има намера целосно да се откаже од увозот на руски гас до крајот на 2027 година, со оглед на тоа што во тој период Словачка и Унгарија, кои сè уште увезуваат руски гас преку гасоводи, би имале нешто пофлексибилна рамка за напуштање на постојните договори.
„Оваа законска ревизија ќе даде поголема флексибилност и ќе ги намали бирократските барања, но пред сè ќе ја намали цената на гасот во ЕУ во време кога се обидуваме да се оддалечиме од несигурните добавувачи“, изјави полскиот европратеник од Европската народна партија Борис Будка по повод одлуката на Европскиот парламент.
Одлуката на Европскиот парламент сè уште треба да биде потврдена од Европскиот совет, што се смета за формалност.
Складирањата на гас обезбедуваат 30 проценти од потрошувачката во ЕУ во текот на зимските месеци.
