Бројот на компании што поднеле барање за стечај во Германија во вториот квартал од 2025 година достигна највисоко ниво од третиот квартал од 2005 година, објави Институтот за економски истражувања во Хале (IWH).
Во јуни оваа година, во Германија беа поднесени 1.420 барања за стечај од компании и партнерства, што е за 23 проценти повеќе во споредба со истиот месец минатата година.
Бројот на стечаји беше за 50 проценти поголем од просекот за јуни помеѓу 2016 и 2019 година, пред пандемијата Ковид-19.
Во вториот квартал од оваа година, 4.524 компании поднесоа барање за стечај, што влијаеше на 45.000 работни места.
Бројот на банкроти се зголеми за седум проценти во споредба со вториот квартал од 2024 година.
Во извештајот се наведува дека ова е најголем број на банкроти од третиот квартал од 2005 година, поголем отколку по големата економска и финансиска криза од 2009 година.