Шведскиот гигант ИКЕА ги прошири своите операции на шпанскиот пазар во угостителството со отворањето на „Лас Дунас де Санта Каталина“ во Лас Палмас, Гран Канарија. Иако е нивниот прв хотел во Шпанија, тој целосно отстапува од вообичаената естетика на ИКЕА. Нема добро познато лого, ниту типичен мебел што обично го придружува брендот.
За разлика од она што гостите би го очекувале, овој бутик-хотел нуди суптилен, неутрален дизајн. Има мешавина од локална култура и природни материјали. Фокусот не е на промоција на брендот, туку на автентично искуство и удобност на престојот. Со овој потег, ИКЕА очигледно се свртува кон подискретен пристап во угостителскиот сектор, оставајќи ги зад себе визуелните клишеа.
Хотелот е во сопственост на „Сартон Канаријас“, дел од групацијата ИКЕА, и им нуди на гостите отворен базен, пространа тераса, градина и бесплатен Wi-Fi. Собите се минималистички, но со јасен акцент на функционалноста и удобноста, што ги прави идеални за современиот патник.
ИКЕА нема да застане само на еден хотел
Сместен недалеку од плажата Лас Алкараванерас, хотелот овозможува брз и лесен пристап до природните убавини и градските погодности. Градот Лас Палмас е популарна дестинација меѓу туристите од Европа во текот на целата година. Покрај тоа, тој е важен деловен центар, што ја прави оваа локација стратешки погодна.
Иако ИКЕА го отвори својот прв хотел во Елмхулт уште во 1964 година, овој нов чекор укажува на посериозна инвестиција во туризмот. Претходните идеи за независни хотелски објекти без директно брендирање сега стануваат реалност.
Со проширувањето на Канарските Острови и растечкиот интерес за бутик хотели, ИКЕА јасно покажува дека гледа долгорочен потенцијал во шпанскиот туристички сектор. Во последниве години, таа бележи стабилен раст и зголемен интерес од меѓународните инвеститори.
