Првото возило за одржливо чистење на канализациската мрежа „E-FLUSH“ неодамна беше пуштено во употреба во главниот град на Австрија. Камионот работи исклучиво на електрична енергија и има електрична правосмукалка со иновативен систем за рециклирање на вода. Ова високотехнолошко возило заштедува вода, ја намалува бучавата и во исто време ја зголемува ефикасноста на работата.
„Со возилото E-FLUSH, се заштедуваат до 265 килограми CO₂ секој ден, а во исто време се подобрува квалитетот на животот со намалување на бучавата“, нагласува градскиот советник за заштита на климата, Јирген Чернохорски. Она што е посебно кај оваа електрична комбинирана правосмукалка е тоа што материјалот што се вшмукува за време на чистењето на отпадните води (мешавина од вода, чакал и талог) се обработува директно во самото возило. Течните компоненти се одделуваат од цврстите остатоци и се враќаат во резервоарот за вода, а рециклираната вода потоа се користи повторно за чистење на канализацијата.
„Така, нема потреба да се зема свежа вода од хидрантот, што заштедува време и ресурси, а ова е голема предност кога станува збор за тесни градски улици“, објаснува директорот на Виенската канализација, Андреас Илмер. Друга предност на електричниот погон е значителното намалување на бучавата, бидејќи нема мотор со внатрешно согорување. За време на канализациските работи, бучавата се намалува за околу 80 децибели. „Тоа е големо олеснување за жителите, особено кога се работи ноќе“, истакнува Илмер. Електричната комбинирана правосмукалка има резервоар за вода со волумен од 2.700 литри и резервоар за талог со волумен од 9.200 литри. Благодарение на системот за рециклирање на вода, може да се заштедат до 10 кубни метри вода дневно.
Во австриската престолнина, 99,9% од домаќинствата се поврзани со канализациската мрежа на градот, долга 2.500 километри, која продолжува да се шири за 10 километри секоја година.
Фото: Pixabay