Цените на акциите паднаа на Волстрит во четврток, бидејќи инвеститорите беа воздржани од ризик пред говорот на претседателот на Федералните резерви на САД, Џером Пауел, што би можело да има значително влијание врз насоката на пазарот.
Дау Џонс изгуби 0,34 проценти, на 44.785 поени, додека S&P 500 се лизна за 0,40 проценти, на 6.370 поени, а индексот Nasdaq изгуби 0,34 проценти, на 21.000 поени.
Инвеститорите се претпазливи бидејќи во петок, на традиционалниот годишен состанок на централните банкари во американскиот град Џексон Хоул, претседателот на Федералните резерви, Пауел, ќе зборува за состојбата во економијата и монетарната политика.
Во последните недели, цените на акциите силно пораснаа благодарение на надежта на инвеститорите дека Федералните резерви ќе ги намалат каматните стапки за 0,25 процентни поени на состанокот на 17 септември, и тие очекуваат уште едно намалување на каматните стапки до крајот на годината.
Ваквите очекувања се зајакнаа бидејќи најновите податоци покажаа дека американскиот пазар на трудот слабее.
Но, од друга страна, најновите податоци покажуваат дека економијата солидно расте и дека инфлацијата е сè уште висока.
Затоа, инвеститорите стравуваат дека Пауел може да го повтори она што го кажува веќе долго време – дека Федералните резерви не треба да брзаат со намалување на каматните стапки сè додека не се види како зголемувањето на царините за увоз од САД влијаело на инфлацијата.
И ова е она што го кажаа неколку други претставници на Федералните резерви овие денови.