Бруто домашниот производ (БДП) во земјите на ОЕЦД порасна за 0,4 проценти во вториот квартал од 2025 година, во споредба со 0,2 проценти во претходниот квартал, при што САД имаа најголем придонес.
„Ова означува враќање на релативно стабилните стапки на раст од околу 0,4 до 0,5 проценти што беа забележани во претходните квартали“, соопшти ОЕЦД во среда, објави агенцијата Анадолија.
Економиите на Г7 забележаа слично забрзување, при што растот на БДП се зголеми од 0,1 процент на 0,4 проценти.
САД беа најголемиот придонесувач за економскиот раст на ОЕЦД во периодот од април до јуни 2025 година, при што растот на БДП се опорави на 0,7 проценти по намалувањето од 0,1 процент во претходниот квартал.
„Меѓу другите економии на Г7, Франција и Јапонија забележаа поскромни подобрувања, при што растот на БДП се зголеми од 0,1 процент на 0,3 проценти во обете земји“, се додава во соопштението.
Спротивно на тоа, растот на БДП во Канада стагнираше по растот од 0,5 проценти во првиот квартал. Во Велика Британија, растот на БДП се забави од 0,7 проценти на 0,3 проценти, првенствено поради падот на инвестициите од 1,1 процент во вториот квартал, по растот од два проценти во првиот квартал.
Германија и Италија забележаа негативен раст, паѓајќи од 0,3 проценти на -0,3 проценти и -0,1 процент, соодветно, при што намалувањето во Германија првенствено беше предизвикано од падот на извозот на стоки.
„Во остатокот од ОЕЦД, ситуацијата беше слична. Од 23-те земји со достапни податоци, 13 забележаа повисоки стапки на раст во споредба со првиот квартал од 2025 година“, се вели во извештајот на ОЕЦД.
Ирска забележа најголемо забавување, со намалување на БДП за еден процент, по значителен раст од 7,4 проценти, главно поттикнат од зголемениот извоз во САД.
Спротивно на тоа, Данска доживеа значителен пресврт, преминувајќи од минус 1,3 на стапка на раст од 1,3 проценти.
На годишно ниво, растот на БДП на ОЕЦД остана стабилен на 1,7 проценти, при што САД забележаа најголемо зголемување од два, а Германија најниско од 0,2 проценти.