Светот на модата се збогува со големиот Џорџо Армани, а неговата смрт веднаш предизвика вистинска гужва на пазарот на употребувана облека. Онлајн платформите забележуваат неверојатен пораст во потрагата по винтиџ парчиња што го носат неговиот потпис, бидејќи обожавателите и колекционерите се обидуваат да обезбедат дел од историјата на модата.
Армани, кој остана на чело на својата модна куќа до својата 91 година, остави неизбришлива трага, од висока мода до попристапни линии како што е Емпорио Армани.
Само еден ден по веста за неговата смрт, во четврток, најголемата европска платформа за облека од втора рака, Vinted, забележа речиси три пати поголем број пребарувања за терминот „Армани“. Сличен тренд е видлив и од другата страна на Атлантикот, каде што американскиот луксузен сајт The RealReal објави скок на пребарувањата од дури 212 проценти во споредба со среда, пишува Ројтерс.
Податоците од Google Trends, исто така, го потврдуваат глобалниот интерес, при што пребарувањата за „винтиџ Армани“ се зголемуваат, особено во родната Италија на дизајнерот и Обединетото Кралство.
Понудата на пазарот расте
Корисниците на популарните апликации за препродажба брзо реагираа. Веќе во петок, на платформата Vestiaire Collective се појавија голем број нови реклами. Меѓу нив се издвојуваат црна свилена јакна од 1990-тите за околу 310 евра и кожна јакна со зајачко крзно од 2002 година за околу 720 евра, што покажува дека сопствениците препознаваат можност за продажба.
Експертите очекуваат враќање на 80-тите
Амар Булаи, сопственик на парискиот луксузен бутик за машка облека „Шез Амар“, вели дека не би бил изненаден ако види зголемување на побарувачката за костуми на Армани од 1970-тите и 1980-тите. Ваквите парчиња, вели тој, се совршено усогласени со актуелните ретро трендови кои фаворизираат широки панталони и лелеави материјали.
„Пред четири или пет години беше невозможно да се продаваат костуми во стилот на 80-тите. Сега тие се вратија во мода, но речиси е невозможно да се најдат“, објасни Булаи. Тој додаде дека е тешко да се процени колку такви парчиња сè уште се чуваат во плакарите.
Армани произведуваше многу, имаше многу подбрендови, па затоа мора да има многу од нив… можеби луѓето сега ќе почнат да ги отвораат своите фиоки“, заклучи тој.