На Волстрит, индексите на берзата се лизнаа од рекордните нивоа во вторникот, а фокусот на инвеститорите беше на прегледот на претседателот на американската централна банка, Џером Пауел, за состојбата во економијата.
Дау Џонс изгуби 0,19 проценти, на 46.292 поени, додека S&P 500 се лизна за 0,55 проценти, на 6.656 поени, а индексот Nasdaq за 0,95 проценти, на 22.573 поени.
Во изминатите три дена, индексите достигнаа рекордни нивоа, благодарение на растот во технолошкиот сектор и надежите на инвеститорите дека ФЕД ќе продолжи да ги намалува каматните стапки.
Пауел за балансирање на инфлацијата и пазарот на трудот
Во своето прво јавно појавување откако ФЕД ги намали каматните стапки минатата недела, Пауел рече дека централната банка мора да ја балансира растечката инфлација со слабеењето на пазарот на трудот при одлучувањето за каматните стапки.
„Фокусот беше ставен на говорот на Пауел. Пораките се претпазливи – тој остави простор за намалување на каматните стапки, но не сигнализираше кога и за колку ФЕД би можел да ги намали каматните стапки. Затоа цените на акциите паднаа. На крајот на краиштата, време е да се повлечеме“, вели Питер Кардиљо, економист во „Спартан Капитал Секјуритис“.
Пад на технолошките акции под притисок
S&P 500 и индексот Nasdaq беа под притисок вчера поради падот на цените на акциите во технолошкиот сектор, кои силно пораснаа во претходните денови и ги турнаа тие индекси на рекордни нивоа.
Цената на акциите на Nvidia падна за речиси 3 проценти, а цените на Amazon.com, Apple и Microsoft исто така паднаа.
Мал раст на европските берзи
А на повеќето европски берзи, цените на акциите пораснаа вчера. Сепак, лондонскиот индекс FTSE ослабе за 0,04 проценти, на 9.223 поени, но франкфуртскиот DAX порасна за 0,36 проценти, на 23.611 поени, а парискиот CAC за 0,54 проценти, на 7.872 поени.
Фото: Pixabay