Поголемиот дел од капиталот во последниот квартал отиде кај веќе етаблирани стартапи, како што се Anthropic и xAI, кои собраа милијарди долари, додека помалите и помалку познати стартапи, особено оние кои не се поврзани со вештачката интелигенција, се соочуваат со тешкотии.
Поради сè уште слабиот пазар за првични јавни понуди и аквизиции, многу инвеститори во ризичен капитал не се подготвени да инвестираат во недокажани компании, според анализата на PitchBook. „Каде и да погледнеме, пазарот е поделен – или сте во индустријата за вештачка интелигенција или не сте, или сте голем играч или не сте“, според PitchBook, според Bloomberg.
Во последниот квартал, американските фондови за ризичен капитал инвестирале 62,7 проценти од сите средства во компании за вештачка интелигенција, додека глобалните инвеститори насочиле 53,2 проценти од капиталот во истата област.
Вкупната вредност на договорите за ризичен капитал од почетокот на 2025 година изнесува 366,8 милијарди долари, од кои најголемиот дел паѓа на САД со 250,2 милијарди. Сепак, додека неколку фирми за вештачка интелигенција добиваат огромни инвестиции, пошироката слика за стартапите е значително помрачна. Бројот на компании што ќе успеат да обезбедат финансирање оваа година ќе биде најмал во последните години, како и бројот на фондови што ќе успеат да соберат нов капитал.
Глобално, 823 фондови за ризичен капитал собраа нешто повеќе од 80 милијарди долари во 2025 година, што е драстичен пад во споредба со 2022 година, кога 4.430 фондови собраа околу 412 милијарди долари. „Инвеститорите денес многу повнимателно избираат каде ќе ги пласираат своите пари, а фокусот е претежно на вештачката интелигенција“, оценува PitchBook.