Претседателката на Европската комисија, Урсула фон дер Лајен, на отворањето на инвестицискиот форум ЕУ-Западен Балкан во Тирана изјави дека Западен Балкан е „цврсто на патот кон членство во Европската Унија“ и им порача на инвеститорите дека е вистинско време да инвестираат во регионот.
Зборувајќи пред лидерите и претставниците на бизнисот од регионот, фон дер Лајен посочи дека предностите на европската интеграција веќе се чувствуваат во секојдневниот живот на граѓаните, наведувајќи го како пример поврзувањето со единствениот систем за плаќање SEPA, кој ги намали трошоците за трансакции до шест пати.
„Тоа е конкретен напредок, не само на хартија, туку и во пракса“, рече претседателката на Европската комисија.
Таа изјави дека земјите што веќе се приклучија кон Европската Унија доживеале „неверојатен економски раст“, што го очекува и Западен Балкан.
„Помислете на последните бранови на пристапување кон нашата Унија. Полската економија се зголеми за трипати за помалку од три децении. Во Хрватска, невработеноста се намали од 17 проценти на четири проценти за нешто повеќе од една деценија. Истото ќе се случи низ целиот Западен Балкан, а не зборувам за некоја далечна иднина. Вашите економии се веќе подготвени за брз раст во наредните години“, рече Урсула фон дер Лајен.
Според неа, целта на Планот за раст за Западен Балкан е да се удвои БДП на овој регион во следната деценија преку отворање на европските пазари, регулаторна интеграција и инвестиции во приоритетни сектори.
„Затоа мојата порака до инвеститорите денес е едноставна. Не дозволувајте оваа можност да ви помине. Време е да инвестирате во Западен Балкан“, рече претседателката на ЕК.
Само на форумот во Тирана беа потпишани десет деловни договори и се разгледуваат 24 нови проекти со вкупна вредност од повеќе од четири милијарди евра.
Два регионални центри – во Србија и Северна Македонија
Фон дер Лајен истакна дека во Србија и Северна Македонија ќе бидат поставени два регионални центри, поврзани со европската мрежа на центри што им овозможуваат на компаниите и стартапите да развиваат, обучуваат и тестираат модели на вештачка интелигенција користејќи ги „суперкомпјутерите“ на Европската Унија.
Во пракса, ова значи дека локалните фирми би можеле да развиваат решенија базирани на вештачка интелигенција користејќи ја инфраструктурата на ЕУ, без да мора сè да прави во Брисел, Берлин или Париз.
Урсула фон дер Лајен, исто така, ја истакна важноста на Западен Балкан во производството на еколошка „чиста енергија“, велејќи дека регионот може да стане центар за производство, складирање и споделување на таква енергија со остатокот од Европа, беше објавено на веб-страницата на Европската комисија.
„Вие градите нов енергетски ‘рбет не само за Западен Балкан, туку и за цела Европа“, додаде таа.
Дополнително, претседателката на Комисијата ја нагласи важноста на интегрирањето на регионалните индустрии во европските вредносни синџири – од производството на батерии и фармацевтски производи до секторот за рециклирање текстил.
„Инвестирањето во Западен Балкан значи инвестирање во идниот европски пазар од 500 милиони луѓе“, заклучи Фон дер Лајен.