Швајцарската група за храна „Нестле“ објави отпуштање на околу 16.000 работни места во четвртокот како дел од планот за зголемување на обемот на продажба, изјави нејзиниот нов извршен директор Филип Навратил, откако најголемиот светски производител на готови производи за јадење објави неочекувано добар раст на приходите од продажба поради повисоките цени на кафето и бомбоните.
Навратил, поранешниот прв човек на „Неспресо“, го замени Лоран Фреше во септември, кој беше отпуштен поради афера со подреден вработен во компанијата. Неодамна, „Нестле“ помина низ невиден период на менаџерски пресврти, што го вклучува и претседателот на компанијата, Пол Булке, кој ја напушти компанијата предвреме, само за да биде заменет две недели подоцна од поранешниот шеф на „Индитекс“, Пабло Исла.
Во третиот квартал од годината, Нестле забележа реален внатрешен раст (RIG) од 1,5 проценти, што далеку ги надмина очекувањата на аналитичарите од 0,3 проценти. RIG се користи за мерење на обемот на продажба, а експертите велат дека ваквите добри бројки би можеле да му купат време на Навратил да остави свој белег на компанијата, по неговото ненадејно унапредување.
Сепак, Нестле продолжува со план за подобрување на ефикасноста во синџирот на производство и снабдување, а како дел од ова, Навратил објави отпуштање на околу 12.000 луѓе во администрацијата, со уште 4.000 работници во производството. Нестле вработува околу 277.000 луѓе низ целиот свет, што е речиси 6 проценти од нивната работна сила.
Швајцарскиот Нестле, најпознат по глобално популарните брендови како што се чоколадите KitKat, инстант кафето Nespresso или инстант супата Maggi, веќе некое време се бори да го стимулира растот на продажбата и да го запре наглиот пад на вредноста на своите акции, бидејќи оперативните трошоци и задолженоста на компанијата се зголемуваат, како и притисокот од акционерите.
Навратил изјави дека зголемувањето на обемот на продажба е главен приоритет на компанијата и дека растот би овозможил и зголемување на целните заштеди на трошоци на 3 милијарди швајцарски франци (3,2 милијарди евра), во споредба со претходно планираните 2,5 милијарди франци до крајот на 2027 година.
Акциите на компанијата го достигнаа својот врв оваа година на 21 март, кога цената беше 91,68 франци, додека на затворањето на тргувањето во среда цената беше 76,13 франци – или 17 проценти пониска. Во споредба со почетокот на годината, акциите пораснаа само за 1,7 проценти.
„Ние негуваме култура на компанијата која дава приоритет на ефикасноста, која не прифаќа губење на пазарен удел и каде што победите се наградуваат. Светот се менува, а Нестле мора да се менува побрзо“, се вели во соопштението на Навратил.