Американскиот претседател Доналд Трамп објави дека ги прекинува сите трговски преговори со Канада, пишува Би-Би-Си.
Во објава на платформата Truth Social, Трамп напиша дека Канада, поточно нејзината најнаселена покраина Онтарио, емитувала реклама во која поранешниот американски претседател Роналд Реган зборувал негативно за царините.
„Врз основа на нивното скандалозно однесување, СИТЕ ТРГОВСКИ ПРЕГОВОРИ СО КАНАДА СЕ ПРЕКИНАТИ“, напиша Трамп доцна во четвртокот.
Претседателот на САД воведе царина од 35 проценти за канадскиот увоз, иако дозволи исклучоци за стоки опфатени со USMCA – договор за слободна трговија меѓу САД, Мексико и Канада постигнат за време на неговиот прв мандат.
Трамп појасни дека видеото, спонзорирано од владата на Онтарио, е направено за да влијае на Врховниот суд на САД, осврнувајќи се на претстојната одлука во ноември за тоа дали сеопфатните глобални царини на Вашингтон се легални.
Во едноминутната реклама објавена минатата недела, гласот на Реган се слуша како зборува преку снимки од њујоршката берза и кранови украсени со американски и канадски знамиња.