САД би можеле да си наштетат себеси со воведување нови санкции врз руските нафтени компании, предупредува „Фајненшл тајмс“, повикувајќи се на проценки од американски и меѓународни енергетски експерти.
Според Амос Хохштајн, управувачки партнер на инвестициската фирма TWG Global, постои реална опасност санкциите да му се вратат како бумеранг на Вашингтон.
„Доколку цената на нафтата значително се зголеми, сите загуби што Русија ги претрпи од санкциите ќе бидат компензирани со зголемувањето на цената. Но, ако цената се зголеми премногу, Русите ќе добијат, додека американските потрошувачи и нашите сојузници ќе изгубат“, изјави Хохштајн за „Фајненшл тајмс“.
Слично мислење изрази и енергетскиот аналитичар Скот Шефилд, кој нагласи дека САД, одлучувајќи за нов бран санкции против Русија, всушност одлучиле да не го ескалираат конфликтот во Украина со испорака на ракети „Томахавк“.
„Наместо воен одговор, Вашингтон сега бара економски притисок“, рече Шефилд.
Претседателот на САД, Доналд Трамп, на 23 октомври објави дека во моментов не планира средба со рускиот лидер Владимир Путин, но дека би сакал средбата да се одржи „кога ќе дојде време“. Во исто време, тој истакна дека „секогаш чувствувал“ дека Путин сака да „ја освои цела Украина, а не само дел од неа“.
Откако воведе санкции врз компаниите Лукоил и Роснефт, цената на нафтата веќе почна да расте, што, според проценките на Фајненшл тајмс, би можело дополнително да го оптовари американскиот енергетски пазар и да ја зголеми инфлацијата.
Руските власти, пренесува „Газета.ру“, во моментов не очекуваат внатрешна енергетска криза, но внимателно ги следат последиците од американските мерки.