На Волстрит, берзанските индекси достигнаа нови рекордни максимуми во понеделник, бидејќи инвеститорите се надеваат на трговски договор меѓу САД и Кина, како и на понатамошно намалување на каматните стапки од страна на американската централна банка.
Дау Џонс порасна за 0,71 проценти, на 47.544 поени, S&P 500 за 1,23 проценти, на 6.875 поени, а индексот Nasdaq за 1,86 проценти, на 23.637 поени.
Новите рекорди на тие индекси, пишува Хина, најмногу се припишуваат на надежта на инвеститорите дека САД и Кина ќе постигнат трговски договор оваа недела.
Американските и кинеските преговарачи во неделата се согласија за рамката на трговскиот договор, за кој американскиот претседател Доналд Трамп и неговиот кинески колега Си Џинпинг ќе одлучат во четврток на состанок во Јужна Кореја.
Доколку се постигне договор, Вашингтон нема да воведе драстични царини за увоз на кинески производи, а Кина ќе се откаже од строгите контроли врз извозот на ретки земни метали.
Дополнително, фокусот на инвеститорите оваа недела ќе бидат кварталните деловни резултати на некои од најголемите технолошки компании во светот – Microsoft, Apple, Alphabet, Amazon и Meta Platforms.
Огромното мнозинство компании што досега објавија деловни извештаи ги надминаа очекувањата и во однос на приходите и заработката.
Затоа, инвеститорите се надеваат дека овој тренд ќе продолжи со резултатите на технолошките компании.
Благодарение на тоа, цените на акциите во технолошкиот и комуникацискиот сектор вчера најмногу пораснаа.
Поддршка за пазарот, пишува Хина, дава верувањето на инвеститорите дека оваа недела челниците на американската централна банка дополнително ќе ги намалат каматните стапки за 0,25 процентни поени на редовната сесија, како во септември.
На азиските пазари, индексите на берзата малку паднаа во вторник, што е последица на корекцијата на цените на акциите.
Индексот MSCI на акциите од Азиско-пацифичкиот регион, без јапонските акции, беше во пад од 0,2 проценти околу седум часа, откако вчера достигна рекордно високо ниво.
Во исто време, цените на акциите во Австралија, Индија, Хонг Конг, Шангај, Јапонија и Јужна Кореја паднаа помеѓу 0,2 и 1,3 проценти.
Во последните недели, цените на акциите силно пораснаа, а на многу пазари, од Јапонија и Јужна Кореја до Тајван, достигнаа највисоки нивоа во историјата. Поради ова, инвеститорите се претпазливи, па затоа решија да почекаат нови вести што би можеле да ги насочат пазарите.