Европските производители на автомобили предупредија дека би можеле да бидат принудени да го прекинат производството во рок од неколку дена, доколку не се најде решение за недостигот на полупроводници, кој се влошува откако Кина го забрани извозот на чипови произведени од Nexperia.
Гардијан објави дека Европската асоцијација на производители на автомобили (ACEA), чии членови се Volkswagen, Stellantis, Peugeot и BMW, изјави дека производителите работат со ограничени залихи и ги повика владите да најдат решение за спорот што е можно поскоро.
„Запирањето на производствените линии може да се случи во рок од неколку дена. Ги повикуваме сите страни да ги удвојат своите напори и да најдат дипломатско решение за оваа критична ситуација“, изјави генералниот директор на ACEA, Сигрид де Врис.
Извршниот директор на Мерцедес-Бенц, Ола Келениус, изјави дека компанијата бара алтернативни добавувачи на чипови на глобално ниво.
Пекинг го забрани извозот на чипови произведени од Некспериа претходно овој месец, наводно поради безбедносни ризици, откако холандската влада одлучи да ја преземе компанијата со седиште во Холандија.
Иако повеќето полупроводници на Некспериа се произведуваат во Европа, околу 70 проценти се спакувани за дистрибуција во Кина, а компанијата сè уште пласира производи на кинескиот пазар.