Извозот на руски гас во Европа преку гасоводот Турски тек достигна рекордни 1,68 милијарди кубни метри во октомври, што е највисоко месечно ниво откако гасоводот беше ставен во употреба во 2020 година, соопшти ТАСС, повикувајќи се на податоци од Европската мрежа на оператори на системи за пренос на гас (ENTSOG).
Транспортот на гас преку Турски тек се зголеми за девет проценти во споредба со септември и за 13 проценти во споредба со минатиот октомври, додека просечната искористеност на гасоводите во октомври изнесуваше 96 проценти од капацитетот.
Гасоводот, кој ги поврзува Русија и Турција преку Црното Море и има капацитет од 31,5 милијарди кубни метри годишно, остана последна активна рута за испорака на руски гас во Европа по прекинот на транзитот низ Украина.