Вкупниот прилив на странски директни инвестиции (СДИ) во првите осум месеци од оваа година изнесуваше 595,58 милиони евра и е за 3,46 проценти повисок во однос на истиот период минатата година, покажуваат прелиминарните податоци од Централната банка на Црна Гора.
Нето приливот на странски директни инвестиции изнесуваше 314,39 милиони евра, што е за 4,75 проценти помалку во споредба со споредбениот период, пишува eKapija.
Податоците од Билтенот на Централната банка покажуваат дека е остварен прилив од 376,83 милиони евра во форма на капитални инвестиции, што претставува 63,27 проценти од вкупниот остварен прилив.
„Во структурата на сопственичките инвестиции, инвестициите во компании и банки изнесуваа 67,97 милиони евра и забележаа намалување од 5,07 проценти, додека инвестициите во недвижности се зголемија за 8,40 проценти и изнесуваа 308,86 милиони евра“.
Приливот на странски директни инвестиции во форма на меѓукомпаниски долг изнесуваше 197,05 милиони евра или 33,09 проценти од вкупниот прилив, што е за 0,69 проценти помалку во споредба со истиот период во 2024 година.
„Останатите 3,64 проценти или 21,71 милиони евра се однесуваат на други инвестиции, односно на приливот врз основа на повлекување на инвестиции од странство“, се наведува во документот.
Гледано по земји, најмногу инвестиции дојдоа од Турција – вкупно 92,19 милиони евра. Од тоа, најголемиот износ на средства се однесува на меѓукомпаниски долг (51,8 милиони евра), додека околу 35,5 милиони евра беа инвестирани во недвижности. Турските граѓани инвестираа 4,8 милиони евра во домашни компании и банки.
На второ место е Србија со инвестиции во вредност од 91,84 милиони евра, при што најголемиот дел – дури 60,9 милиони – е поврзан со недвижности. Следува Германија со инвестиции од 43,48 милиони евра, а граѓаните на оваа земја исто така првенствено инвестирале во недвижности – 28,63 милиони евра.
Инвестиции во вредност од 41,56 милиони евра пристигнаа во Црна Гора од САД, а инвестициите во недвижности доминираа со 31,89 милиони. Следен на листата е Кипар со инвестиции од речиси 40 милиони евра, првенствено во домашни компании и банки – 24,4 милиони евра.
Обединетите Арапски Емирати инвестираа 30,65 милиони евра, со приближно еднакви инвестиции во недвижности (14,4 милиони евра) и меѓукомпаниски долг (13,84 милиони евра).
Некогаш најголемите инвеститори во Црна Гора, Русите, паднаа на седмата позиција во однос на износот на инвестициите. Руските граѓани инвестираа околу 25,6 милиони евра, при што повеќе од половина од средствата, околу 13 милиони за да бидеме прецизни, се поврзани со недвижности.