Шефот на концернот „Мерцедес“, Ола Келениус, не очекува условите за работење во Кина да станат полесни – напротив, германскиот производител мора да се прилагоди.
„Од крајот на пандемијата, гледаме дека динамиката на пазарот не е иста како што беше пред 15, 20 години. Покрај тоа, постои неверојатно интензивна пазарна конкуренција“, рече Келениус за списанието „Автомобилвохе“.
„На пазарот се натпреваруваат 100 производители на автомобили, а можеби можете да се справите со 30 до 40“, рече тој, проценувајќи дека претстои некаков вид прочистување.
„Засега, ова значи дека високиот интензитет на конкуренцијата ќе продолжи и во наредните години“, и потребно е да се соочиме со оваа конкуренција, рече шефот на германскиот гигант.
„Сега не сакаме 100 проценти од пазарот, туку само нашиот удел. Сосема е реално дека со помош на добра стратегија за производство и стратегија за индустријализација, можеме да го зачуваме, па дури и да го прошириме“, додаде Келениус.
„Сепак, не сме наивни. Реалистични сме. Следните години во Кина ќе бидат тешки. За да стане поконкурентен, Мерцедес мора да стане и покинески“, рече тој.
Кина е најголемиот пазар на Мерцедес, по што следат Европа и Северна Америка.
Германскиот концерн продаде 125.100 возила во третиот квартал, што е за 27 проценти помалку отколку во истиот квартал минатата година.
