Германија слави победа за своите производители на автомобили откако Европската комисија ја олабави планираната забрана за мотори со внатрешно согорување до 2035 година.
Сепак, оваа промена на политиката може да се покаже како неочекуван подарок за кинеските конкуренти, давајќи им дополнително време да ја консолидираат својата предност на европските и глобалните пазари во развој, пишува Политико.
Извршното тело на ЕУ тврди дека новиот пакет за автомобили, претставен минатата недела, воспоставува рамнотежа помеѓу климатските цели и зачувувањето на глобалната конкурентност на европскиот сектор. Сепак, левоориентираните политичари и аналитичари не го делат тоа мислење.
„Пакетот не решава ниту едно од структурните проблеми на европските производители на автомобили во Европа или глобално“, рече Нилс Редекер, ко-директор на Центарот Жак Делор. „Постои технолошки јаз помеѓу европските производители на автомобили и оние во Кина. Пакетот не ја поместува иглата на ниту еден од овие фронтови.“
Европската автомобилска индустрија се соочува со голем број проблеми: губи место на кинескиот пазар каде што купувачите се свртуваат кон домашните брендови со подобри електрични автомобили, домашната продажба се забавува, а постои и трансатлантска трговска војна поттикната од американскиот претседател Доналд Трамп.
Подарок за кинеската автомобилска индустрија
Комисијата ја олабави целта за намалување на емисиите до 2035 година од 100 проценти на 90 проценти од нивоата во 2021 година. Останатите 10 проценти, велат тие, ќе мора да се компензираат со инвестиции во зелен челик и алтернативни горива.
Еден од клучните барања на индустријата беше да се дозволи производство на plug-in хибриди, возила што комбинираат електричен мотор и класичен мотор со внатрешно согорување, дури и по 2035 година. Брисел попушти, дозволувајќи хибриди, чисти мотори со внатрешно согорување и таканаречени „продолжувачи на домет“ – мали мотори што ја полнат батеријата и на тој начин го зголемуваат дометот на возилото.
Опасноста е дека таквата одлука би можела да ги охрабри производителите да продолжат да инвестираат во мотори со внатрешно согорување или хибриди, наместо да се фокусираат на стигнување на Кина во сегментот на целосно електрични возила.