Во наредните години, германските железници ќе инвестираат повеќе од 23 милијарди евра во модернизација на мрежата, што е најголемата инвестиција досега.
„Повеќе од половина од средствата одат во постојната мрежа“, изјави Филип Нагл, раководител на DB InfraGo, кој е задолжен за железничката инфраструктура.
„Преостанатиот дел од средствата е наменет за дигитализација, изградба на нови и проширување на постојните железници, како и за мали и средни проекти, станици и голем број други помали проекти“, изјави Нагл за dpa.
Веќе оваа година, железниците инвестираа околу 19 милијарди евра во модернизација на инфраструктурата, која е застарена и преоптоварена.
Илјадници свртници и стотици километри надземни водови, како и речиси 2.300 километри пруга, беа обновени. Покрај тоа, беа пуштени во употреба 60 нови сигнални постројки.
Во текот на 2025 година, на железничката мрежа имало околу 26.000 градилишта, додека за следната година се очекуваат околу 28.000. Според InfraGo, околу 950 од вкупно 5.700 станици биле модернизирани оваа година.
И покрај огромните инвестиции, патниците секојдневно ја чувствуваат лошата состојба на железничката мрежа во Германија. Точноста на возовите никогаш не била полоша, бројните градилишта го забавуваат сообраќајот, а дефектите се чести.
Секој систем во одреден момент ја достигнува границата на употребливост, особено како што се зголемува интензитетот на сообраќајот, нагласи Нагл.