Во текот на изминатата година, американскиот долар ја изгуби својата улога како „безбедно засолниште“ во периоди на глобална нестабилност, додека швајцарскиот франк дополнително ја зајакна својата позиција како најстабилна валута во светот, според анализите на финансиските експерти.
Според економистите, една од клучните причини за слабеењето на доларот е фактот што самите САД предизвикаа значителни нарушувања во глобалната економија, првенствено во областа на меѓународната трговија. По децении водење на либерализацијата на пазарот, просечната царинска стапка за увоз од САД се зголеми од 2,3 на дури 14 проценти, што е највисоко ниво од 1939 година.
Последица од таквата политика беше падот на вредноста на доларот на светските пазари. Таканаречената „зелена банкнота“ ослабе во однос на сите 15 глобално важни валути, а најголем пад е забележан во однос на шведската круна (минус 20 проценти), мексиканскиот пезос (минус 16 проценти) и швајцарскиот франк (минус 14 проценти). Единствен исклучок е јапонскиот јен, според кој падот беше занемарлив.
Според проценките на аналитичарите, доларот не успеа да се опорави од април 2025 година, кога американските царински стапки беа нагло зголемени.
За Томас Штуки, главен инвестициски директор на Кантоналната банка на Сент Гален, падот на вредноста на доларот е еден од најважните финансиски настани во изминатата година. Според индексот пондериран со трговијата, доларот изгуби околу седум проценти од својата вредност.
Од друга страна, швајцарскиот франк ја задржа стабилноста. Карстен Јуниус, главен економист на банката Ј Сафра Сарасин, процени дека 2025 година била релативно мирна година за франкот. Тој потсети дека во вториот квартал од минатата година, Швајцарската национална банка интервенирала на девизниот пазар со купување долари, но во, како што изјави, умерен и оправдан обем.
Еврото ослабе за еден процент во однос на франкот, додека, според Јуниус, разликата во каматните стапки помеѓу франкот и еврозоната достигна 2,6 проценти, што претставува најголем спред од обединувањето на Германија.
Во споредба со франкот, британската фунта ослабе за пет проценти, кинескиот јуан за девет проценти, а јапонскиот јен за дури 12 проценти, што аналитичарите го сметаат за значителен губиток на вредност. Меѓу малиот број валути што покажаа релативна сила во однос на франкот е и шведската круна.
Според експертите, монетарната политика одигра мала улога во движењата на девизниот курс минатата година, додека трговијата и геополитичките фактори беа одлучувачки. Јуниус очекува дополнително, но мало зајакнување на швајцарскиот франк во однос на еврото и доларот, објавува швајцарскиот весник „Ноје Цирхер Цајтунг“.