Националната администрација за патувања и туризам на САД објави дека бројот на туристички посети на САД во декември 2025 година е намален осми месец по ред.
Се наведува дека 2026 година треба да биде добра година за американскиот туризам бидејќи ја одбележува 250-годишнината од американската независност и 100-годишнината од иконскиот автопат Рута 66, долг 4.000 километри од Чикаго на исток до Санта Моника на западниот брег, објавува американскиот портал businessinsider.com и потсетува дека САД, заедно со Мексико и Канада, се домаќини на Светското првенство оваа година.
Според анализата на Светскиот совет за патувања и туризам (WTTC) за 2025 година, од 184 земји, САД се единствената за која се предвидуваше пад на приходите од туризам, во износ од околу 12,5 милијарди долари.
Порталот нè потсетува дека од почетокот на вториот мандат на Трамп во Белата куќа, американскиот претседател Доналд Трамп и неговата администрација воведоа царини на долгогодишни сојузници, честопати се закануваа со анексија на Канада и Гренланд, задржуваа странски туристи на границата и вршеа масовни депортации, а наскоро, според некои најави, треба да се воведе програма што ги проверува податоците на странските туристи на социјалните мрежи пред да влезат на американска почва.
Затоа сè поголем број земји предупредуваат да не се патува во САД и повикаа на бојкот на САД, нарекувајќи ја таа земја „непријателска држава“.
Пред две години, САД беа прогласени за водечка туристичка дестинација во светот, но денес Америка сè повеќе гледа што се случува кога патниците чувствуваат дека ризикот од патување е поголем од очекуваното задоволство, според порталот businessinsider.com.