Поради растечката загриженост за прекумерен капацитет, Меѓународниот монетарен фонд (ММФ) ја повика Кина да ги намали владините субвенции за индустријата. Фондот проценува дека Пекинг издвојува околу четири проценти од БДП за субвенционирање на компании во клучните сектори и верува дека ова ниво треба да се намали за два процентни поени на среден рок.
Индустриските политики на Кина „предизвикуваат меѓународни прелевања и притисоци“ и, во комбинација со слабата домашна побарувачка, ја наведоа Кина „повеќе да се потпира на извозот на производи како извор на раст“, се вели во извештајот, според „Фајненшл тајмс“.
Негативен ефект врз економијата
„Индустриската политика овозможи технолошки иновации во некои сектори, но целокупниот ефект врз економијата беше негативен“, рече Сонали Џаин-Чандра, шеф на мисијата на ММФ за Кина и Азиско-пацифичкиот регион, посочувајќи на „неправилна распределба на ресурсите“ и „прекумерна потрошувачка“.
ММФ претходно ја повика Кина да го намали обемот на своите индустриски политики, но досега не процени за колку.
Препораките на извештајот на ММФ доаѓаат откако Кина го зголеми извозот на произведени стоки, вклучително и производи со повисока додадена вредност, како што се електричните возила, што предизвика тензии со западните земји околу субвенциите.
Трговскиот суфицит на Кина во размената на стоки надмина 1000 милијарди долари минатата година. Светските лидери, како што е францускиот претседател Емануел Макрон, предупредија за „неподносливи нерамнотежи“ во трговијата.
ММФ ја поздрави иницијативата на Пекинг за намалување на „инволуцијата“, термин што го користи Кина за да се опише прекумерната ценовна конкуренција, но рече дека треба дополнително да „ја разјасни својата стратегија“.
Фокус на потрошувачката
Кинеските креатори на политики се соочуваат со предизвици како што се заканата од дефлација, слабата побарувачка на потрошувачите, високата невработеност кај младите и продолженото забавување на пазарот на домување што не покажува знаци на закрепнување.
Уште во 2024 година, ММФ препорача Кина да издвои 5,5 проценти од БДП во период од четири години со цел да ја ублажи кризата на пазарот на недвижности, да ги заврши започнатите проекти за домување и да овозможи излез на неодржливите инвеститори од секторот. Во најновиот извештај, Фондот предлага централната влада да обезбеди пет проценти од БДП за истите цели во следните три години.
Во исто време, ММФ верува дека кинеската економија треба посилно да се насочи кон модел на раст базиран на потрошувачка. Меѓу препораките се ублажување на ограничувањата за пристап до социјалните права за внатрешните мигранти, воведување попрогресивен даночен систем и зголемување на пензиите.