Европската комисија се подготвува да побара споделување на горивото за авиони во рамките на Европската унија (ЕУ) поради конфликтот на Блискиот Исток.
Европскиот комесар за енергетика, Дан Јергенсен, изјави дека Брисел ќе продолжи да ја следи состојбата со залихите на гориво и капацитетите на рафинериите, да го координира снабдувањето и евентуално да го прераспределува горивото во рамките на ЕУ, нешто слично на оние напори кога за време на пандемијата мораше да се дистрибуираат количини на вакцини.
„Се движиме кон криза која досега првенствено беше криза на високи цени, кон криза во снабдувањето. Ова прво ќе се почувствува кај авиогоривата. Многу брзо се приближуваме кон неа“, изјави комесарот за „Фајненшл тајмс“.
Според него, мерките на Брисел евентуално ќе вклучуваат поделба или прераспределба на авиогоривата меѓу земјите-членки.
Шефот на Меѓународната агенција за енергија, ИЕА, Фатих Бирол, минатата недела тврдеше дека ЕУ сè уште има авиогорива за шест недели. Причината за сето ова е што значителни количини керозин се набавуваат токму од Блискиот Исток.
„Луфтханза“ и „КЛМ“ се меѓу авиокомпаниите кои веќе објавија дека ќе го намалат бројот на летови како одговор на кризата со снабдувањето со гориво.
„Мораме да бидеме искрени и да кажеме дека ситуацијата ќе стане доста сериозна и тоа е причината зошто ќе воведеме мерки. Постои реална опасност, ако конфликтот продолжи, да се приближуваме кон лето на поскапи авионски билети и откажани летови“, рече Јергенсен.
Планот за прераспределба на горивото може да стане политички чувствителен и да потсети на тешкотиите што се случија за време на пандемијата.
Сепак, Јергенсен верува дека е убеден дека земјите-членки нема да имаат забелешки на планот.
„Во ЕУ постои чувство на солидарност и ние сме свесни дека ова е криза што мора да ја решиме заедно. Планот ќе вклучува соработка со земјите-членки, добавувачите на гориво, аеродромите и авиокомпаниите за алтернативни опции за снабдување со гориво. Нашата цел е да нема региони, аеродроми или земји-членки кои се непропорционално погодени во споредба со другите“, рече Јергенсен.
Исто така, намерата е да се создаде еден вид мапа за следење на состојбата со набавката на гориво, за да може Европската комисија да има јасен увид во производството и трговските текови.
Брисел има намера да ги процени постојните капацитети на рафинериите и да открие како рафинериите би можеле да се користат уште поефикасно за да се постигне максимално можно производство.
Комесарот за енергетика додаде дека се разгледува и ослободувањето на стратешки резерви. Во моментов, земјите-членки можат да изберат кои нафтени производи да ги чуваат како стратешки резерви, а Брисел размислува да предложи посебна обврска во оваа смисла за горивото за воздухопловство.