Производителот на луксузни автомобили од групацијата „Фолксваген“ е особено нападнат од американските трговски бариери бидејќи нема сопствено производство во таа земја.
Зголемувањето на американските царински стапки за увоз на автомобили од Европската Унија „значително“ би влијаело на „Ауди“, кој има намера да го лансира својот најголем теренец на американскиот пазар ова лето, изјави во вторник финансискиот директор на компанијата, Јирген Ритерсбергер.
Американскиот претседател Доналд Трамп се закани во петокот дека ќе ги зголеми царините за увоз на автомобили од Европската унија од сегашните 15 на 25 проценти, обвинувајќи ја Унијата дека не ги почитува одредбите од минатогодишниот трговски договор со САД. Мерките сè уште не се официјално потврдени.
„Едно е јасно: доколку се воведат овие царини, тие значително ќе ја оптоварат нашата компанија“, рече директорот, додавајќи дека Ауди сè уште ја проценува ситуацијата.
Производителот на луксузни автомобили од групацијата Фолксваген е особено погоден од американските трговски бариери бидејќи нема сопствено производство во таа земја и се потпира на увоз од Европа и Мексико за испораки до американските клиенти.
Луксузниот теренец Q9 на Ауди, кој треба да се појави на американскиот пазар ова лето, се произведува во објект во Братислава и затоа би подлежи на предложените царини.
Изградбата на производствена база во Соединетите Американски Држави долго време беше предмет на дискусија во германската компанија. Ритерсбергер рече дека Ауди сега разгледува различни опции со матичната компанија Фолксваген.
„Без политичка поддршка во форма на субвенции, намалување на царинските давачки или слични мерки, ќе ни биде тешко“, рече директорот.
Ауди ја потврди својата прогноза за приходи за 2026 година, која не вклучува евентуално зголемување на царинската стапка на САД, која моментално изнесува 15 проценти. Оваа давачка веќе ја чини групацијата Фолксваген околу четири милијарди евра годишно.
Под притисок на царините и жестоката конкуренција од кинеските производители, подружниците на „Фолксваген“ веќе почнаа да ги намалуваат трошоците и да прават промени во асортиманот на автомобили, објави Групацијата. Затоа, „Ауди“ има намера да намали 7.500 работни места до 2029 година.