Американската прехранбена компанија „Марс“ има намера значително да го прошири својот производствен погон во градот Ступино во Московската област до 2027 година, со зголемување на производствениот капацитет за речиси 500 тони слатки дневно, покажаа денес податоците од веб-страницата на државниот орган за надзор на градежништвото.
„Фабриката за слатки на „Марс“ ќе биде проширена со нов производствен погон кој ќе се простира на повеќе од 26.000 квадратни метри. Во објектот ќе бидат сместени линии за производство и пакување чоколади и слатки. Компанијата ќе изгради проширување на постојната фабрика во Ступино“, се вели во соопштението објавено на веб-страницата на канцеларијата.
Три производствени линии
Главниот оддел на државниот орган за надзор на градежништвото го доби известувањето за почетокот на изградбата на фабриката. Во новата зграда, компанијата планира да започне со три производствени линии. Две ќе произведуваат 216 тони чоколадо дневно, а третата ќе произведува до 67 тони слатки дневно.
Според податоците од главната регионална канцеларија на државниот орган за надзор на градежништвото, изградбата ќе биде завршена во јуни 2027 година. Фабриката ја гради „Марс ДОО“, руската подружница на американската група за храна. Точниот износ на инвестицијата не беше прецизиран.
Групацијата „Марс“ работи на рускиот пазар од 1991 година, кога ја основа подружницата „Мастер Фудс“, која продаваше слатки, како што се бомбони M&M и чоколади „Марс“ и „Сникерс“, и храна за домашни миленици, како што се „Вискас“ и „Педигри“.
Во 1995 година, првиот производствен комплекс на компанијата беше отворен во малото гратче Ступино, околу сто километри јужно од Москва, а компанијата беше преименувана во „Марс ДОО“. Покрај фабриката во Ступино, компанијата има производствени капацитети и во градот Луховица, исто така во Московската област, во Новосибирск и во Уљановската област.