Кина остана најголем трговски партнер на Германија во првиот квартал од 2026 година, но со многу мала предност во однос на САД, покажаа новите пресметки засновани на прелиминарни податоци од Германскиот федерален завод за статистика. Вкупната стокова размена меѓу Германија и Кина изнесуваше 61,5 милијарди евра, додека трговијата со САД достигна 60 милијарди евра.
Експертите предупредуваат дека во текот на годината САД повторно би можеле да го преземат првото место меѓу трговските партнери на Германија. Аналитичарите на организацијата „Германија трговија и инвестиции“ проценуваат дека разликата меѓу Кина и САД е многу мала и би можела брзо да се промени, пренесува „Ројтерс“.
Германскиот извоз во Кина се намали за 12,5 проценти на 18 милијарди евра, што предизвика Кина да падне на деветтото место меѓу купувачите на германски стоки. Според проценките на GTAI, постои можност Кина да испадне од десетте најголеми извозни пазари за германски производи во текот на годината.
Во исто време, германскиот увоз од Кина се зголеми за 6,4 проценти, на 43,5 милијарди евра, а се очекува дека би можел дополнително да се зголеми, меѓу другото, поради можни субвенции за кинеските производители на електрични возила на германскиот пазар. Извозот на Германија во САД се намали за 12 проценти, на околу 36 милијарди евра, но САД сепак останаа најголемиот поединечен пазар за германски стоки.