Производителот на чипови за вештачка интелигенција „Nvidia“ повторно ги надмина очекувањата на Волстрит благодарение на силната побарувачка за неговите напредни чипови за вештачка интелигенција. Компанијата објави во среда дека во периодот од февруари до април остварила нето добивка од 58,32 милијарди долари (53,7 милијарди евра) или 2,39 долари по акција, во споредба со 18,78 милијарди долари (17,3 милијарди евра) или 76 центи по акција во истиот период претходната година. Без еднократните ставки, „Nvidia“ објави заработка од 1,87 долари по акција.
Приходите се зголемија за 85 проценти на 81,62 милијарди долари (75,1 милијарди евра), во споредба со 44,01 милијарди долари (40,5 милијарди евра) една година претходно.
„Изградбата на фабрики за вештачка интелигенција, најголемата инфраструктурна експанзија во историјата на човештвото, се забрзува со неверојатна брзина“, рече директорот на Nvidia, Јенсен Хуанг.
Доминацијата на Nvidia на пазарот на GPU (графички процесорски единици) е главниот двигател на нејзиниот раст.
Диверзификација на клиентите
„Иако Nvidia е првенствено фокусирана на графички процесори, таа е сè уште најголемиот играч на пазарот на CPU (централна процесорска единица), далеку пред AMD и Intel со 20 милијарди долари продажба на CPU“, рече Бен Барингер, директор за технолошки истражувања во Quilter Cheviot.
Заедно со растот на приходите и профитот, оперативните трошоци на Nvidia се зголемија за 49 проценти на 7,75 милијарди долари (7,1 милијарди евра).
Компанијата, исто така, се обидува да ја диверзифицира својата база на клиенти за да стане помалку зависна од големите оператори на центри за податоци, бидејќи владите и другите индустрии стануваат сè поважен извор на побарувачка за чипови за вештачка интелигенција, објавува „Блумберг“.
За тековниот квартал, „Нвидија“ предвидува приходи од околу 91 милијарда долари (83,7 милијарди евра), додека аналитичарите очекуваат 87,29 милијарди долари (80,3 милијарди евра).