Бакарот малку се зголеми на пазарите на стоки и надомести дел од загубите од минатата недела, благодарение на зголеменото купување во Кина и континуираните приливи на металот во Соединетите Американски Држави, што ги поддржа изгледите за побарувачката.
Цената на бакарот падна за речиси три проценти на Лондонската берза за метали (LME) во петокот, што беше најголемиот дневен пад од средината на март. Ова се случи откако растот на вработеноста во САД ги надмина сите очекувања на аналитичарите, поттикнувајќи ги проценките дека Федералните резерви на САД (ФЕД) би можеле да ги зголемат каматните стапки оваа година. Порестриктивната монетарна политика обично ја забавува економската активност и ја намалува потрошувачката на суровини како што се бакарот и алуминиумот, пишува Блумберг.
Сепак, иако очекувањата за евентуално зголемување на каматните стапки го ограничуваат растот на цените на основните метали, стабилната побарувачка треба да спречи значителен пад на цената на бакарот, изјави Гао Џин, аналитичар во „Шуохе Асет Менаџмент“.
Трговијата со бакар е дополнително оптоварена од зголемените трошоци за енергија и инфлацијата предизвикана од војната на Блискиот Исток. Во исто време, приближувањето на јунскиот рок во кој администрацијата на претседателот Доналд Трамп треба да донесе нова одлука за евентуално воведување царини за увоз во САД повторно го поттикна приливот на метали на американскиот пазар, што ги намалува достапните залихи во другите делови од светот.
Залихите на бакар во магацините што ги следи Шангајската фјучерс берза паднаа на 169.512 тони од петок, што е најниско ниво од почетокот на годината. Ова укажува дека активноста на купување во Кина останува силна, првенствено поради растечките потреби за електрификација. Бакарот игра клучна улога во производството на електрични кабли и опрема.
Цената на бакарот порасна за 0,5 проценти на 13.581 долари за тон на Лондонската берза за метали рано утрово. Движењата на другите основни метали беа мешани: калајот ослабе за 1,6 проценти на 52.085 долари за тон, додека алуминиумот доби 0,4 проценти на 3.607 долари за тон.
Фото: pixabay