САД ја надминаа Саудиска Арабија во извозот на нафта и нафтени деривати и во мај и го потврдија првото место на светската ранг-листа, трет месец по ред, покажаа податоците од компанијата за собирање податоци за поморски сообраќај „Вортекс“ во четврток.
Преземањето на титулата најголем извозник претставува пресврт за САД, кои со децении зависеа од нафтата од Блискиот Исток и претрпеа тежок удар на почетокот на 1970-тите кога одредени членки на Организацијата на земјите извознички на нафта (ОПЕК) им воведоа ембарго на нафта поради нивната поддршка за Израел, истакнува Ројтерс.
Извозот на нафта и горива од САД скокна на околу 10,5 милиони барели дневно во мај, покажаа податоците од Vortex, при што САД ја задржаа титулата најголем извозник во светот трет месец по ред. Рускиот извоз достигна седум милиони барели дневно во мај, пресмета Ројтерс. Извозот од Саудиска Арабија изнесуваше 5,9 милиони барели дневно, според податоците од Vortex.
Во целата 2025 година, Саудиска Арабија извезуваше околу 8,1 милиони барели дневно, а Соединетите Американски Држави 6,6 милиони барели дневно. Рускиот извоз достигна околу 5,8 милиони барели дневно, според податоците на Vortex.
Во услови на прекини во испораките на нафта и нафтени деривати преку Ормутскиот теснец, бројни земји се свртеа кон американски добавувачи. Така, од март, според проценките на американската Администрација за енергија, нето извозот на нафтени деривати од САД изнесуваше просечно 6,2 милиони барели дневно.
