На меѓународните берзи денес, референтната нафта од типот Брент се тргуваше по цена од околу 72 долари за барел, додека американската WTI беше на околу 69 долари. Тоа е само мало зголемување во споредба со претходниот ден, но сепак значително пониско од пред еден месец, кога Брент надмина 100 долари за барел за време на врвот на геополитичките тензии. Според пазарните податоци, Брент изгуби повеќе од 24 проценти од својата вредност за само еден месец, што претставува еден од најголемите падови оваа година.
Причината за смиреноста на пазарот лежи во обновениот сообраќај на танкери низ Ормутскиот теснец и напредокот на преговорите меѓу Соединетите Американски Држави и Иран. Аналитичарите проценуваат дека ризикот од прекини во снабдувањето е значително намален, поради што премијата за ризик што ја креваше цената на нафтата нагоре во претходните недели исчезна, објавува Ројтерс.
Охрабрувачки проценки доаѓаат и од најголемите финансиски институции во светот. Аналитичарите на UBS ја намалија прогнозата за цената на Брент за следниот период на околу 80 долари за барел, додека Citigroup верува дека, доколку геополитичката ситуација дополнително се стабилизира, цената би можела да падне дури и на 60 долари за барел до крајот на годината.