Русија воведе целосна забрана за извоз на дизел гориво за нафтените компании до 31 јули, изјави за РИА Новости рускиот вицепремиер Александар Новак.
„Денес беше воведена забрана за извоз на дизел гориво, а тоа ќе ги зголеми испораките на домашниот пазар“, рече Новак на состанокот на Владата со рускиот претседател Владимир Путин.
Владата објави дека одлуката е донесена за да се помогне во одржувањето на стабилна состојба на домашниот пазар на гориво.
Во исто време, воведените ограничувања нема да важат, меѓу другото, за дизел горивото извезено од Русија во согласност со меѓународните меѓувладини договори.
Путин ги нарече тешкотиите на Русија со горивото привремени и ги поврза, меѓу другото, со обидите на Украина да ја наруши празничната сезона и рече дека непријателот се обидува да создаде атмосфера на вознемиреност во руското општество.
Рускиот претседател ѝ наложи на владата брзо да ја реши ситуацијата со горивото во Крим и да донесе одлуки за субвенционирање на купувањето гориво, велејќи дека одлуките за поддршка на горивото за Крим и јужна Русија мора да се донесат сега, а не подоцна.